Mingəçevir Dövlət Universitetində (MDU) “SOCAR Midstream” ilə əməkdaşlıq çərçivəsində Layihə İdarəetmə Ofisinin yaradılması və fəaliyyətinin təmin edilməsi məqsədilə təlimlərə başlanılıb. Yeni ofis universitetin strateji hədəflərini dəstəkləyən layihələrin işlənib hazırlanması və idarə olunması sahəsində fəaliyyət göstərəcək.

Layihə menecmenti üzrə mütəxəssis Nicat Qarayev tərəfindən keçirilən bir aylıq təlim proqramı sözügedən ofisdə çalışacaq heyətin bilik və bacarıqlarının artırılmasını, onların peşəkarlıq səviyyəsinin yüksəldilməsini və praktiki olaraq bir layihə təklifinin hazırlanmasını nəzərdə tutur.

Təlimlərdə müvafiq beynəlxalq təşkilatların onlayn formatda təşkil etdikləri “Nəticəyə əsaslanan idarəetmə” (Results-based management) kurslarını başa vuran universitetin gənc akademik və inzibati heyət üzvləri iştirak edirlər.

Ümumi tanışlıq və fokus qrupunun seçilməsi məqsədilə təlimçi ilə keçirilən ilk görüş zamanı mövcud ehtiyaclar və səriştələr barədə müzakirələr aparılıb, təlim proqramının məzmunu və formatı müəyyən edilib.

Qeyd edək ki, “SOCAR Midstream” və MDU arasında əməkdaşlığın əsası cari ilin aprelin 15-də universitetin innovativ inkişafını dəstəkləyən memorandumun imzalanması ilə qoyulub.