Mingəçevir Dövlət Universitetində (MDU) Təhsil Nazirliyi və Bakı şəhəri üzrə Təhsil İdarəsinin dəstəyi ilə  təşkil olunan “Gələcəyini qur!” Gəncliyə Dəstək Layihəsi çərçivəsində təlimlər keçirilib. Təlimlərə MDU-nun tələbələri və ətraf rayonların ümumtəhsil məktəblərinin yuxarı sinif şagirdləri qatılıblar.

Təlimlərin açılışında layihənin koordinatoru Turan Cəfərova, MDU-nun rektoru Şahin Bayramov, layihənin həmtəsisçisi və direktoru Bəhruz Hidayətzadə çıxış edib.

Koordinator T.Cəfərova layihə haqqında ümumi məlumat verib, onun əhəmiyyətindən, gənclərin inkişafına, düzgün karyera və ixtisas seçiminə dəstəyindən danışıb.

Gənclər üçün belə bir faydalı təşəbbüsün reallaşdırılmasını təqdirəlayiq hal kimi dəyərləndirən rektor Ş.Bayramov layihənin həyata keçirilməsinə dəstək göstərən bütün tərəfdaşlara təşəkkür edib.  Universitetdə təhsilalanların hərtərəfli inkişafının diqqət mərkəzində saxlanıldığını vurğulayan Ş.Bayramov sözügedən layihədə MDU-nun iştirakından məmnunluğunu ifadə edib və bu çərçivədə həyata keçirilən tədbirlərə təmsil etdiyi ali təhsil müəssisəsinin də töhfə verəcəyinə əminliyini bildirib.

Əsas məqsədin yüksək bilik və bacarığa malik gənclərin həyatda uğur əldə etmələrinə dəstək və töhfə vermək, Azərbaycan cəmiyyətinə yüksək intellekt və etik dəyərlərə malik sağlam düşüncəli gənclər qazandırmaq olduğunu qeyd edən layihənin həmtəsisçisi və direktoru B.Hidayətzadə göstərilən dəstəyə görə minnətdarlığını ifadə edib. Həyata keçirilən tədbirlər, onların əhatə dairəsi və hədəf qrupu haqqında məlumat verən B.Hidayətzadə layihənin dəyərlərindən, əldə edilən nəticələrdən, gələcək fəaliyyət planından danışıb.

Sonra təlimçilər- “Təhsildə İnnovativ Texnologiyalar” Əlavə Təhsil Mərkəzinin icraçı direktoru İsa Qasımov “Uğurlu gələcək, innovativ bacarıqlar”, ADA Universitetinin İnformasiya texnologiyaları və Mühəndislik fakültəsinin baş müəllimi Araz Yusubov “Elm və yaradıcılıq: yaradıcılığın alqoritmi” və təhsil psixoloqu Hüseyn Həsənov “Məsuliyyət” mövzusunda təqdimatlarla çıxış ediblər.

Təlimlər iştirakçılar tərəfindən maraqla qarşılanıb.