Bakı Ali Neft Məktəbi (BANM) və “PAŞA Həyat Sığorta” ASC arasında gənclərin peşəkar inkişafına yönəldilmiş tədbirlərin təşkilinə dair memorandum imzalanıb.

Əməkdaşlıq sazişini BANM- in rektoru Elmar Qasımov və “PAŞA Həyat Sığorta” ASC-nin İdarə Heyətinin sədri  Niyaz İsmayılov imzalayıblar.

Memorandum təhsil sahəsində qarşılıqlı əməkdaşlığın gücləndirilməsi və inkişaf etdirilməsi, Ali Məktəbin tələbələrinin təhsil keyfiyyətinin və peşə fəaliyyətinin yaxşılaşdırılması, bu istiqamətdə sıx inteqrasiyanın təmin edilməsi üzrə səylərin birləşdirilməsi  məqsədini daşıyır. Eyni zamanda, Ali Məktəbin tələbə kontingenti üçün şirkət tərəfindən müxtəlif istiqamətlərdə bilik mübadiləsi sessiyalarının, tələbələr üçün sınaq iş müsahibələrinin keçirilməsi, istehsalat və ya könüllü təcrübə proqramlarının təşkil olunması, şirkət əməkdaşlarının Ali Məktəbdə spiker qismində çıxış etməsi, habelə zərurət olduqda onların tədris fəaliyyətinə cəlb edilməsi planlaşdırılır.

Memorandumda şirkət tərəfindən müəyyənləşdirilmiş kateqoriyalara məxsus tələbələrin sertifikasiya və ya digər təhsil xərclərinə sponsorluq edilməsi, Ali Məktəb tərəfindən irəli sürülən layihələrə birgə dəstəyin verilməsi və tələbələrin peşə təcrübəsinin artırılması ilə bağlı olan tədbirlərin həyata keçirilməsi öz əksini tapıb.

Əməkdaşlıq sazişində tələbələrin şirkətin ofis binasına və ya başqa məkanlara turların, habelə digər informativ ekskursiyaların, müxtəlif müsabiqələrin təşkil edilməsi də nəzərdə tutulur. Bütün bunlar “PAŞA Həyat”ın işə götürən brendinin gücləndirilməsi istiqamətində atılan addımlardır.

“Biz Azərbaycanın intellektual əsgərlərini yetişdiririk. “PAŞA Həyat Sığorta” ASC ilə imzaladığımız Əməkdaşlıq Memorandumu bu istiqamətdəki fəaliyyətimizi sürətləndirəcək. BANM-in tələbələrinin “PAŞA Həyat”da təcrübə keçməsi onların gələcək karyeralarında mühüm rol oynayacaq. Eyni zamanda, bu, onların gələcəkdə “PAŞA Həyat”da işlə təmin olunmalarına imkan yaradır. Ali Məktəbimizin məzunları “PAŞA Həyat”da çalışarsa, bununla qürur duyaram”,  - deyə BANM-in rektoru E.Qasımov bildirib.

“PAŞA Həyat Sığorta”nın İdarə Heyətinin sədri  N.İsmayılov isə vurğulayıb ki, hər bir şirkətin uğurunun sirlərindən biri də onun potensiallı kadrlarıdır:”Biz BANM-nin tələbələrinə təcrübə keçmələri üçün hər cür şərait yaradacağıq. Tələbələrin təcrübə qazanması onların gələcək karyeralarında mühüm rol oynayır. Digər tərəfdən, tələbələrin “PAŞA Həyat”da təcrübə keçmələri onlara iş imkanları yaradır. Biz gələcəkdə tələbələr üçün işçi bazası yaratmağı düşünürük. BANM-in çox uğurlu məzunları, yüksək səviyyəli tələbələri var. İstəyirik ki, “PAŞA Həyat”da məhz belə mütəxəssislər çalışsın”.