Müasir dövrün reallıqları  təhsil sahəsində çalışanların kommunikativ və ünsiyyət bacarıqlarının inkişaf etdirilməsi zəruriliyini  şərtləndirir.  Ünsiyyət bacarıqlarından söhbət düşəndə isə, ilk növbədə,  ingilisdilli müəllimlər və onların  səriştə və bacarıqlarının təkmilləşdirilməsi önə çıxır.  Son  illərdə  ingilis dilinin əhəmiyyətinin daha da artması isə bu sahənin müəllimlərindən çeviklik, xüsusi qabiliyyətlər tələb edir.

Elə bu zərurəti nəzərə alan ölkəmizin ilk ingilisdilli qeyri-hökumət təşkilatlarından olan İngilis Dili Müəllimləri Birliyi (AzETA)  artıq bir neçə ildir ki, nüfuzlu beynəlxalq ekspertlərin iştirakı ilə müəllimlərimiz üçün  konfranslar təşkil edir. Növbəti belə konfranslardan biri iyunun 23-24-də Xəzər Universitetinin Dünya məktəbində təşkil olunmuşdu. Müəllimlərimizin xüsusi fəallığını müşahidə etdiyimiz tədbiri AzETA-nın təsisçisi və prezidenti Rəqsanə Məmmədova açaraq iştirakçıları salamlayıb və belə bir konfransın təşkilinə göstərdiyi dəstəyə görə Xəzər Universitetinin rəhbərliyinə minnətdarlıq edib.

Azərbaycanı özünə doğma hesab edən Con Silver

Tədbirdə  çıxış edən amerikalı diplomat,  ABŞ səfirliyinin təhsil məsələləri üzrə  regional direktoru Con Silver  Azərbaycana ilk dəfə 1997-ci ildə gəldiyini və 21 ildir ki,  AzETA ilə əməkdaşlıq etdiyini deyib. Ölkəmizin ingilisdilli müəllimləri üçün təlimlər keçdiyini vurğulayan C.Silver  artıq Azərbaycanı özünə doğma hesab etdiyini bildirib.  Diplomat müəllimlərimizlə bölgələrdə keçirdiyi təlimlərdən,  onlar üçün kurikulumların hazırlanmasından danışıb.   O, regional qurum olaraq AzETA-nın tədbirlərinə təkcə təşkilati deyil, həm də əməli dəstək verdiklərini  diqqətə çatdırıb.  Diplomat  təhsilalanların yeni məlumatların qəbul olunması,  analizi, kreativ, yaradıcı düşünmənin vacibliyini  qeyd edərək  bu sahədə müəllimlərimizlə bir sıra təlimlər keçiriləcəyini, təqdimatlar hazırlanacağını  söylədi. C.Silver müəllimlərimiz üçün yeni proqram təminatlı layihələrin hazırlanması təşəbbüsü ilə çıxış edib.   

“Əsas məqsəd təkcə ingilis dilinin tədrisi deyil...”

Ölkəmizdə   Təhsil Nazirliyinin həyata keçirdiyi  bir sıra beynəlxalq layihələrdən tanıdığımız  “British  Council”  təşkilatının  Azərbaycan nümayəndəliyinin rəhbəri, tədbirin plenar spikerlərindən olan  Elizabet Uayt çox qayğılı görünürdü. O, çıxışına Azərbaycan dilində başladı. Tədbir iştirakçılarını Azərbaycan dilində salamlamağın onun üçün çətin olmadığını deyən E.Uayt Azərbaycanda fəaliyyət müddətinin  3 həftə sonra başa çatacağını və  ölkəmiz üçün  çox darıxacağını bildirib. 

O,   təmsil etdiyi qurumun  son 5 ildə Azərbaycan Respublikasının Təhsil Nazirliyi ilə sıx əməkdaşlıq etdiyini  diqqətə çatdıraraq növbəti  illərdə  də “British  Council”  və Təhsil Nazirliyi arasında əməkdaşlığın məhsuldar olacağına  əminliyini  ifadə edib.    AzETA-nın ölkəmizdə ingilisdilli müəllimlərin inkişafında əhəmiyyətli rolundan danışan səfir ötən illər ərzində  təşkilatın və beynəlxalq qurumların  birgə layihələri sayəsində yüzlərcə azərbaycanlı gəncin ingilis dili biliklərini  təkmilləşdirdiyini, indi onların  dünyanın nüfuzlu universitetlərində təhsil aldıqlarını diqqətə çatdırıb.

E.Uayt   Azərbaycanın könüllü müəllimləri ilə ölkədə təhsilalanların dil biliklərinin artırılması layihələrində yaxından iştirak etdiklərini  bildirib.  Təmsil etdiyi qurumun dünyanın  100-dən artıq ölkəsində ingilisdilli təlimlərin həyata keçirilməsinə dəstək verdiyini  diqqətə çatdırıb.  “Əsas məqsəd təkcə ingilis dilinin tədrisi deyil,  həm də ölkələrimiz, vətəndaşlarımız  arasında etimadı formalaşdırmaqdır”  deyən  E.Uayt   “Yeni dili öyrənərsən yeni ruh qazanarsan” çex atalar sözünü nümunə gətirib.  Onun sözlərinə görə, şagirdlərə yeni ruhu qazanmaqda kömək edənlər isə müəllimlərdir.

Tərcüməçilik də tədris olunmalıdır

AzETA ilə son 17 ildir ki,  sıx əməkdaşlıq edən Azərbaycan Dillər Universitetinin İngilis dilinin tərcüməsi kafedrasının professoru Qılıncxan Bayramovun ingilisdilli müəllimlərimiz arasında nüfuzu böyükdür.  Rəqsanə Məmmədova onu AzETA ailəsinin “mənəvi atası” kimi qiymətləndirdi. Q.Bayramov ötən illər ərzində hər zaman təşkilatın  yanında olub, öz təcrübəsini bölüşüb, dəstəyini əsirgəməyib. 

Q.Bayramovun  sözlərinə görə,  bu cür tədbirlər artıq ənənəyə çevrilib. Bu cür görüşlərdə  könüllüər  öz tədris metodlarını, fikir və düşüncələrini, qayğılarını paylaşırlar.  Xarici təşkilatların nümayəndələri  də tədbirlərə dəstək göstərirlər.  Ötən tədbirlərdə ABŞ, Türkiyə səfirliklərinin nümayəndələri də iştirak ediblər. Bunun səbəbi nədir?  Səbəbi  Azərbaycanın inkişafıdır.  “İngilis dilinin tədrisində ən mühüm məsələ tərcümədir.  Lakin tərcümə hər şeyi vermir. Uşağa sevgini, hissləri necə çatdırmalı?  Bunları uşaqlara ilk günlərdən çatdırmalıyıq.  Dil sadəcə ünsiyyət vasitəsidir.   Dünyada elə məşhur adamlar olub ki, onlar xarici dili bilmirlər. Baxmayaraq ki, məşhurdurlar.  Ona görə də tərcüməçilik də tədris olunmalıdır.  Çünki tərcüməçisiz   heç nəyə nail olmaq  olmaz. Elə şeylər var ki, onlar yalnız ana dilində  çatdırıla  bilər.  Sevgini  uşaqlar ana dilində almalıdırlar.  Tədris də ana dilində olmalıdır”.

“Yaxşı öyrənək ki, yaxşı öyrədək” 

Azərbaycan Müəllim İnkişafı Mərkəzinin rəhbəri Qrem Pollok  AzETA-nın “Daha yaxşı öyrənək ki, daha yaxşı öyrədək”  şüarının ona çox yaxın olduğunu deyib.  Onun sözlərinə görə, istənilən binanın gözəlliyi təkcə onun xarici görünüşündə deyil, həm də daxili məzmunundadır. Daxili məzmunun gözəlliyi isə müəllimlərimizin fəaliyyətinin başlıca prinsipidir.  Q.Pollak Azərbaycan Müəllim İnkişafı Mərkəzi olaraq ingilisdilli müəllimlərimiz  üçün təşkil olunan beynəlxalq təcrübə, mübadilə  proqramlarından danışıb.   Azərbaycan Müəllim İnkişafı Mərkəzinin  respublikamızda ilk rəsmi Cambridge Assessment English CELTA Tədris Mərkəzi kimi  akkreditə olunduğunu deyən  Q.Pollak əlavə edib ki,  məqsədimiz beynəlxalq resursları Azərbaycana gətirmək,  yüksək hazırlıqlı, beynəlxalq standartlara cavab verən  ingilisdilli müəllimlərin  hazırlığına nail olmaqdır. 

Qeyd edək ki,  AzETA-nın missiyası ölkəmizdə ingilisdilli müəllimlərin peşəkar inkişafında yüksək keyfiyyətli təhsilə dəstək göstərməkdir. Təşkilat artıq 10 ildən çoxdur ki,   müasir təhsil dünyasının əsas trendlərinə dair  regional və beynəlxalq konfranslar təşkil edir. Məqsəd təşkilat üzvlərinin öz fikir, təcrübə və biliklərini daha geniş şəkildə paylaşmalarına, onların şəxsi və peşəkar inkişafına töhfə verməkdir.  Konfransda  tanınmış türkiyəli ekspert, “ES-Akademi” şirkətinin qurucusu, doktor Erdəm Söyləməzin müəllimlərimizə təbrik məktubu,  beynəlxalq təşkilatları təmsil edən plenar spikerlərin müəllimlərimiz üçün təqdimatları dinlənilib, AzETA-nın tədbirlərində  fəallıq göstərən müəllimlərə fəxri fərmanlar təqdim olunub.

Oruc MUSTAFAYEV