Zəngilan rayon Təhsil Şöbəsinin tabeliyində fəaliyyət göstərən 4 nömrəli ümumi orta məktəb tərəfindən “Tarixi abidələri qoruyaq” mövzusunda tədbir keçirilib.

Təhsil şöbəsindən verilən məlumata görə, tədbirdə məktəbin direktoru, pedaqoji heyəti və V sinif şagirdləri iştirak edib.

Tədbirdə çıxış edən məktəbin tarix müəllimi Şahnaz Bağırova respublikamızda yerləşən  qədim yaşayış məskənləri və  bu günədək gəlib çatmış qiymətli tarixi abidələrimiz barədə şagirdlərə ətraflı məlumat verib. Daha sonra Ermənistanın torpaqlarımızı işğalı dövründə tarixi-mədəniyyət abidələrimizi  qəddarcasına dağıtdıqları vurğulanıb.

Həmçinin, şagirdlər tərəfindən  müxtəlif tarixi abidələrimiz barədə təqdimatlar hazırlanaraq nümayiş etdirilib.

Qeyd edək ki, hər il  aprel ayının 18-i dünyada Tarixi Abidələrin Mühafizəsi Günü kimi qeyd olunur.

Şakir CƏFƏROV