Nədənsə həmişə  səsinin sehri ilə məni haldan-hala salan   fortepiano, yaxud piano haqqında düşünərkən  dramatik rolların mahir ifaçısı olan mərhum xalq artisi Yaşar Nurinin “ Kökdən düşmüş piano” televiziya tamaşasında  oynadığı bənzərsiz rol yadıma düşür. Filmdə  Yaşar Nuru piano ustası rolunu   fərqli tərzdə  oynayır. O, bu musiqi alətinin hər dilinin, hər notunun  dərin  fəlsəfi  məzmunu, onların  səsinin qulaqda deyil, ürəkdə  dinlənildiyi   barədə  sanki mahir  bir pianoçu kimi tamaşaçıya söyləyir. Deyir ki, heç vaxt pianonuzu  kökdən düşməyə qoymayın və onu  yaşadığınız evin ən  işıqlı, ən yaraşıqlı  yerində  yerləşdirin. Onda   həyat ahənginizi qoruyan, ona rəng qatan  ana səsi, övlad nəfəsi, bülbül cəhcəhəsi var...

Adı birincilər sırasında

Azərbaycan Milli Konservatoriyasının tərkibində fəaliyyət göstərən  İncəsənət  Gimnaziyasında  fortepiano  ixtisası üzrə təhsil alan Nuranə Əliyevanın  adı  bütün müsabiqə və festivallarda  birincilər  sırasında çəkilib. Həmişə də   qazandığı uğurlarla o, təhsil aldığı məktəb kollektivinə, müəllimlərinə  və valideynlərinə, onu tanıyanlara və sevənlərə  hədsiz sevinc hissləri yaşadıb. Pandemiyanın tələblərinə uyğun olaraq biz onunla onlayn şəraitdə görüşüb  ətraflı  söhbətləşdik.  Həmsöhbət olacağımızı, barəsində yazı hazırlamaq fikrində olduğumu biləndə özünəməxsus tərzdə utancaqlıq da nümayiş etdirdi. Hiss etdim ki, tərifi o qədər də sevən gənc deyil. Amma  danışmalıydı ki, biz də, sizlər də  bu istedad sahibinin  yaradıcılıq dünyasına  birlikdə baş vura bilək, nailiyyətləri barədə məlumatlı olaq. Çətinliklə olsa da mənimlə  həmsöhbət olmağa və sevimli musiqi aləti olan fortepiano ilə xarüqələr yaratdığı barədə   geniş məlumat verməyə razılığını ala bildim.

IX  beynəlxalq on-line  müsabiqəsində

Bu günlərdə o, Frans List Mərkəzinin təşkilatçılığı ilə keçirilən (Franz Liszt Center Piano Competition) pianoçularun beynəlxalq müsabiqəsində  III yerə layiq görülüb. Fürsəti əldən verməyib qalibi mən də təbrik etdim.  Mədəniyyət Nazirliyi və Azərbaycan Dövlət Akademik Filarmoniyasının “Gənclərə dəstək” layihəsi çərçivəsində 2 Fevral “Gənclər günü”nə həsr olunmuş “Gəncliyin dalğasında” virtual konsertdə də Nuranə Əliyeva öz istedad və bacarığını nümayiş etdirdiyini söylədi.   Dedi ki,  “Kainat” Gənclik Mərkəzinin keçirdiyi İslam Dünyası gənc klassik musiqi ifaçılarının IX beynəlxalq on-line müsabiqəsində I yerə layiq görüldüyüm üçün ilk öncə məktəbimizin direktoru Aytən Əhmədovaya təşəkkür edirəm.

Danışdıqca səsinin tembrindən həyəcanlı olduğunu hiss edirdim. Odur ki, bir az təmkinli olmağı tövsiyə etdim. Cavabında, inanın ki, bütün müsabiqə və festivallarda yaşadığım həyəcanlı anları sizinlə danışarkən  qeyri-ixtiyari təkrar yaşayıram, söylədi, sonra isə özünü ələ alıb, məsləhətimi yerinə yetirirmiş kimi  təmkinlə  söhbətini davam etməyə başladı.

Laureat adını qazanıb

Beynəlxalq müsabiqələr laureatıyam. Şübhəsiz musiqiçi ailəsində böyüməyimin bu sahədə nailiyyətlərə imza atmağımda  rolu, təsiri  böyük olub. Ancaq buna baxmayaraq   hər dəfə  birincilik qazanmaq naminə əzmkarlıq nümayiş etdirmişəm, bütün yarışmalara   özümü  səfərbər etmişəm  ki, qələbə  məndən  yan ötüşə bilməsin. İnadkarlığım enerjimlə, enerjimsə hədsiz həvəsimlə birləşməsəydi  mən səhnədə pərvalana bilməzdim.

Mahnıların qanadlarında

Mən ifa etdiyim mahnıların qanadlarında yüksəlirəm, inanın, sanki real həyatdan  ayrılıb başqa bir aləmə  qovuşuram mahnı ifa edərkən. Budur mənim  bütün nailiyyətlərimin əsas  səbəbi, qaynağı, mayası. Çəkdiyim  yuxusuz gecələrin bəhrəsidir uğurlarım.  Yəni, mən   musiqiylə yaşayıram,  musiqiylə nəfəs alıram. Həmişə münsiflər heyətinin  alqışları altında mənə   təqdim olunan mükafatları alanda bilirsiniz hansı hissləri yaşayıram, necə sevinirəm? Hər dəfə sevincimi  müəllimlərimlə və valideynlərimlə  bölüşməyə tələsirəm. Çünki  bütün qələbələrimdə onların payı kifayət qədərdir.  2018-ci il “Testene-Art” III Beynəlxalq İncəsənət festival-müsabiqəsində, Moskvada, Türkiyədə, Fransada  keçirilən beynəlxalq müsabiqələrdə  diplom və kuboklarla layiq görülmüşəm.  Paris Beynəlxalq Konservatoriyasının direktoru Ədilə Əliyevadan, Moskva P.İ.Çaykovski adına Dövlət Konservatoriyasının dosenti Sergey Qlavatskidən aldığım ustad dərsləri  məni daha da yeni-yeni  mahnılar ifa etməyə    ruhlandırır.

“Alem Talant Star” müsabiqəsində

Qazaxıstanın Aktobe şəhərində keçirilən   gənc istedadların “Alem Talant Star” müsabiqəsinə 800 iştirakçının qatıldığı  yarışmada Qran-pri qazandım.“Testene Art Baku” III Beynəlxalq incəsənət festival-müsabiqəsində  müxtəlif  yaş qrupları üzrə respublikamızın və dünyanın bir çox  ölkələrindən nümayəndələr təmsil olunurdular.  Münsiflər heyətindən  adımın  I yerə layiq  olduğunu eşitdikdə  hansı  hissləri  keçirdiyimi  təsəvvür etmək çətindir.   Fransada  Nikolay Rubinşteyn adına beynəlxalq musiqi festivalında  da yarışmamız  çox maraqlı  keçdi, II yeri qazandım. Amma ruhdan düşmədim.  II yer qazanmağımın da səbəbi həyəcan  oldu.  

İfa etdiyi mahnının notlarını hədiyyə edib

İtaliyada keçirilən Pietro Argento beynəlxalq müsabiqəsində  Qara Qarayevin “Neftçilər” əsərinin ifa etdim. Mahnı çox xoşlarına gəlmişdi. Müsabiqədən sonra münsiflər  heyəti ifa etdiyim mahnının notlarını məndən istədi. Qaliblərin sırasında mənim də adım vardı. Beynəlxalq müsabiqələrə qatıldıqca dostlarımın sayı da artırdı.

İfaçılıq sənətinin  mahir bilicisi  olmaq

Əvvəllər  ingilis dilini  zəif bildiyimdən   xarici uşaqlarla  ürəyim istəyən qədər ünsiyyət qura bilmirdim.   Çox utanırdım.  Bu problem də artıq arxada qalıb,  sərbəst danışa bilirəm. Boş vaxtlarımda   dünyaşöhrətli klassiklərin -   İ.S.Baxın, L.V.Bethovenin, V.A.Motsartın, V.Y.Haydnın  əsərlərindən  parçalar ifa edirəm. Əminəm ki, zəhmətim hədər getməyəcək, əzmkarlığım sayəsində qazandığım uğurlar  gələcəkdə ən böyük arzularımın reallaşmasına  zəmin yaradacaq.  Arzum  isə təbii olaraq gələcəkdə  ifaçılıq sənətinin ən mahir bilicisi kimi səhnələri fəth etmək, məşhur musiqiçi  kimi  tanınmaqdır.

 Sifai SƏFƏROVA