Bakı Ali Neft Məktəbinin (BANM) rektoru Elmar Qasımov Çin Neft Universitetinin (Pekin) nümayəndə heyəti ilə görüşüb. Görüşdə Çin Neft Universitetinin vitse-prezidenti, professor Dong Zhaoxia, universitetin beynəlxalq təhsil kollecinin dekanı, professor Zhang Yongxue, beynəlxalq ofisinin bölmə rəhbəri Li Lingyun, beynəlxalq təhsil kollecinin tələbələrin axtarışı şöbəsinin əməkdaşı Günay Əliyeva və Ali Məktəbin məsul əməkdaşları iştirak ediblər.

Rektor Elmar Qasımov qonaqlara BANM və burada tədris edilən ixtisaslar haqqında informasiya verib. Rektor qeyd edib ki, BANM-da tədris edilən “Proseslərin avtomatlaşdırılması mühəndisliyi” ixtisası ötən il  Azərbaycanda “İlin ən nüfuzlu ixtisaslı” seçilib. Rektor həmçinin bildirib ki, hər iki universitetdə tədris ingilis dilində olduğundan BANM ilə Çİn Neft Universiteti arasında tələblərarası mübadilə proqramı rahat şəkildə həyata keçirilə bilər.

Çin Neft Universitetinin vitse-prezidenti, professor Dong Zhaoxia 1953-cü ildə yaranmış Çinin ilk neft universitetinin bu il 65 ilinin tamam olduğunu bildirib və bu münasibətlə Ali Məktəbin rektoru Elmar Qasımovu 22 sentyabr 2018-ci il tarixində Çində keçiriləcək “Energetika universitetləri rektorlarının Forumu”na dəvət edib. Xanım Dong Zhaoxia Çin Neft Universitetinin BANM-la əməkdaşlığında maraqlı olduğunu və birgə tələbə mübadilə proqramları, neft-qaz sektoru üzrə təhsil alan çinli tələbələrin Azərbaycanda istehsalat təcrübələrinin təşkilini əsas prioritetlərdən hesab etdiyini bildirib.

Tərəflər arasında müzakirələrdən sonra yaxın zamanda BANM-ın iki tələbəsinin Çin Neft Universitetində, 2 çinli tələbənin isə BANM-da təhsilini davam etdirməsi haqqında razılığa gəlinib. Həmçinin BANM ilə Çin Neft Universiteti arasında bu ilin sentyabr ayında müqavilə imzalanması qərarlaşdırılıb.